''Mərhələni keçdiyimizi fikirləşmək böyük axmaqlıq olar'' - Roberto Bordin

Tarix: 12 Iyul 2019 00:28

"Əlbəttə, nəticədən çox razıyam. Ancaq ən çox futbolçuların yeni mövsümdə ilk oyuna yanaşmalarından razı qaldım. İlk dəqiqələrdən istəkli, motivasiyalı idilər. Mənim üçün əsas bu, idi. Artıq mərhələni keçdiyimizi fikirləşmək böyük axmaqlıq olardı. Buna görə cavab oyununu düşünmək lazımdır. Bizi qarşıda hələ bir həftə gözləyir. Cavab oyununa da yaxşı hazırlaşmalıyıq".

Bunu "Neftçi"nin baş məşqçisi Roberto Bordin Moldovada "Sperantsa"ya 3:0 hesabı ilə qalib gəldikləri Avropa Liqasının I təsnifat mərhələsinin ilk görüşündən sonra mətbuat konfransında deyib. İtaliyalı mütəxəssis digər sualları da cavablandırıb...

- Düşünmürsünüzmü ki, asan qələbə oldu?

- İndi bəziləri belə düşünə bilər. Ancaq bu, belə deyildi. Meydanın vəziyyəti də yaxşı deyildi. İlk hissədə rəqib qapımıza cəmi 1 zərbə vurdu. Yeni mövsümdə ilk rəsmi matça yaxşı başlamağımız mühüm idi. Futbolçularıma tapşırmışdım ki, oyuna diktə edən tərəf biz olaq.

- Adətən, səfər komandaları müdafiə futbolu oynayır. Ancaq siz hücum futbolu göstərdiniz. Bu, ondan irəli gəlir ki, Moldova çempionatını yaxşı tanıyırsınız, yoxsa komandanıza inanırsınız?

- Əlbəttə, ona görə hücum futbolu seçdim ki, futbolçuların xüsusiyyətlərinə bələdəm. Mənə elə gəlir ki, futbolçular hər şeyi düzgün yerinə yetirdilər.

- Rəhman Hacıyev oyuna yaxşı qoşularaq gözəl qola imza atdı. Onu yenidən "Neftçi"nin əsas heyətində görə biləcəyik?

- Rəhmanla yanaşı, digər oyuna qoşulanları da qeyd etmək lazımdır. Hamı yaxşı oyun göstərdi. Bizdə yaxşı futbolçular çoxdur, rəqabət güclüdür. Buna görə heyətdə rotasiya edə bilərik.

- "Neftçi" çoxdandır avrokuboklarda belə inamlı qələbə qazanmırdı. Bu fakt sizin üçün nə dərəcədə önəmlidir?

- Nəticə vacibdir. Ancaq mənim üçün bundan önəmli olan futbolçuların istəyi, oyuna yanaşmalarıdır. Əlbəttə, 3 qol vurmaq çox xoşdur. Amma fiziki formada yaxşı olan belə rəqibə qarşı düzgün oynamaq daha önəmli idi.

- Gənc futbolçu İsmayıl Zülfüqarlını meydana buraxdınız. Bu, hesabın verdiyi rahatlıq idi, yoxsa onu meydanda tez-tez görəcəyik?

- Çox yaxşı gənc futbolçudur. Bizdə digər belə oyunçular var. Hesab bu cür olanda, İsmayıla Avropa Liqasında debüt etmək imkan verdim. Bəli, 3:0 öndə olmağımız mənə bu qərarı verməyimə imkan yaratdı (Report).