Kompakt “Sony Xperia Ace 2” smartfonu təqdim olunub

Tarix: 22 May 2021 21:52

"Sony" şirkəti "Xperia Ace 2" smartfonunu rəsmən təqdim edib. Yeni qurğu mayın 28-dən etibarən ağ, qara və mavi olmaqla üç rəng variantında satışa çıxarılacaq.

Sonxeber.net ictnews.az-a istinadən bildirir ki, smartfon müasir ölçülərə görə kompakt modellər sırasına aid edilir. Belə ki, ekranın diaqonal ölçüsü 5,5 düym təşkil edir. Möhkəm "Gorilla Glass 6" qoruyucu şüşəsinə malik "HD " formatlı panel tətbiq edilib. Displeyin yuxarı hissəsində 8 meqapikselli kameranın yerləşdiyi kiçik kəsik yer nəzərdə tutulub.

Qurğunun əsasını 2,3 giqahers takt tezlikli səkkiz "ARM Cortex-A53" hesablama nüvəsini və "IMG PowerVR GE8320" qrafik kontrollerini birləşdirən "MediaTek Helio P35" prosessoru təşkil edir.

Əsas kamera iki komponentdən ibarətdir: bu, 13 meqapikselli sensor və 2 milyon pikselli yardımçı sensordur. "IP68" sertifikasiyası rütubət və tozdan qorunmanı təmin edir.

Smartfon 4 giqabaytlıq operativ yaddaş, 64 giqabaytlıq quraşdırılmış yaddaş, "microSD" slotu, yan daktiloskopik skaner və qulaqcıq üçün 3,5 millimetrlik standart çıxışla təchiz edilib.

Qabaritlər 140 × 69 × 8,9 millimetr, çəki 159 qram təşkil edir. Kompakt ölçülərə baxmayaraq yeni qurğu 4500 milliamper/saat tutumlu güclü akkumulyatora malikdir. "Sony Xperia Ace 2" smartfonu 200 dollar dəyərində qiymətləndirilib.