Bakıdan qlobal çağırışlara dərhal cavab: 2 milyard ABŞ dolları həcmində... - ŞƏRH

Tarix: 1 Iyun 2021 12:03

"Ölkəmiz dünyada gedən siyasi proseslərə, qlobal çağırışlara, problemlərə və ən əsası müasir dünyamızda nəinki humanitar və sosial, eyni zamanda siyasi gündəliyin əsas məsələsi və mövzusu olan COVID-19 infeksiyasının meydana çıxdığı ilk gündən Prezident İlham Əliyevin rəhbərliyi altında bu məsələyə də zamanında və adekvat reaksiya göstərdi. Bu isə bir daha təsdiq etdi ki, Prezident İlham Əliyevin idarəçilik sistemi vətəndaşmərkəzli sütunlara söykənir". 

Bunu Sonxeber.net-a açıqlamasında politoloq Şəbnəm Həsənova deyib.

O bildirib ki, Azərbaycan dövlətinin atdığı addımların, göstərdiyi sistemli yanaşmanın nəticəsi olaraq ölkəmizdə karantin rejimi tədricən yumşaldılıb:

"Ümumdünya Səhiyyə Təşkilatının əsas qərarverici orqanı olan Ümumdünya Səhiyyə Assambleyasının 2021-ci il mayın 24-dən 31-dək "Pandemiyaya son qoyaraq növbəti pandemiya təhlükəsinin qarşısının alınması: birlikdə daha sağlam, təhlükəsiz və ədalətli dünyanın qurulması" mövzusuna həsr edilmiş virtual şəkildə keçirilən 74-cü sessiyasında qurumun baş direktoru Tedros Adhanom Qebreyesusun dəvəti əsasında Prezident İlham Əliyevin videoformatda çıxışı, ilk günlərdən etibarən Azərbaycanın müvafiq istiqamətdə atdığı addımlar, məsələyə sistemli, ardıcıl, bununla yanaşı ədalətli yanaşması ölkə başçımızın dünyada bu istiqamətdə aparılan işlərdə sadəcə Azərbaycan xalqının deyil, bütövlükdə bütün bəşəriyyətin ədalətli şəkildə yararlanmasının tərəfdarı olduğunu göstərdi. Bu istiqamətdə Azərbaycan ÜST-ün atdığı addımları və göstərdiyi səyləri hər zaman dəstəkləyib. Ölkəmizdə qısa zaman kəsiyində 13 modul tipli və 1 daimi xəstəxana inşa edildi. Əgər ölkə daxilində COVİD-in gətirdiyi çətinliklərlə üzləşən ölkə vətəndaşlarına və sahibkarlıq subyektlərinə 2 milyard ABŞ dolları həcmində sosial-iqtisadi təşviq paketi təqdim edildisə, bununla yanaşı dünya birliyinin etibarlı tərəfdaşı olan Azərbaycan ÜST-ə 10 milyon ABŞ dolları könüllü maliyyə dəstəyi verdi, koronavirusla əlaqədar 30-dan artıq ölkəyə humanitar və maliyyə yardımı göstərdi, eyni zamanda 2021-ci ilin "Səhiyyə işçiləri ili" elan edilməsini də yüksək qiymətləndirir. Bütün bu addımların nəticəsi olaraq ÜST Azərbaycanı nümunəvi ölkə adlandırılıb.

Prezident İlham Əliyev öz çıxışlarında hər zaman qeyd edir ki, pandemiyadan çıxış yolu dünya dövlətlərinin ümumi səylərinin ortaya qoyulmasıdır. Bu baxımdan da Azərbaycan Qoşulmama Hərəkatı adından BMT-nin İnsan Hüquqları Şurasında bütün ölkələrin peyvəndlərə bərabər və universal çıxışının təmin edilməsi ilə bağlı qətnamə irəli sürdü və həmin qətnamə cari ilin mart ayında yekdilliklə qəbul olundu. Ölkə başçımız etdiyi bütün çıxışlarda bütün ölkələri həmrəyliyə çağırır, birtərəfli addımlar atılmamasının, peyvəndin bütün ölkələrin xalqlarına çatmalı olduğunun vacibliyini vurğulayır. Qlobal çağırışlara adekvat və ədalətl reaksiya göstərən ölkə başçımız bu məsələdə bir daha bütün dünya birliyini həmrəyliyə və xüsusilə də ən az inkişaf etmiş dövlətlərə dəstəyə səslədi. Bu gün ölkə daxilində Azərbaycan dövlətinin atdığı addımların, göstərdiyi sistemli yanaşmanın nəticəsi olaraq ölkəmizdə karantin rejimi tədricən yumşaldılıb".

Təhməz Əsədov