Yeni qatlanan “Samsung” smartfonlarının buraxılış tarixi açıqlanıb

Tarix: 27 Iyun 2021 22:56

"Samsung" şirkəti avqustda rəsmən təqdim ediləcək elastik ekranlı smartfonların növbəti nəslinin istehsalına başlayıb. Bu barədə "Gizmochina" nəşri məlumat yayıb.

Sonxeber.net ictnews.az-a istinadən bildirir ki, söhbət "Galaxy Z Fold 3" və "Galaxy Z Flip 3" modellərindən gedir. Cənubi Koreya şirkəti artıq bu smartfonların istehsalına başlayıb və onların hər biri üçün gündəlik sifariş rekord 50 və 70 min ədədə çatıb. "Samsung" ümumilikdə 7 milyon yeni nəsil qatlanan smartfon buraxmaq niyyətindədir.

Blogerlərin sözlərinə görə, "Galaxy Z Fold 3" və "Galaxy Z Flip 3" smartfonlarının dünya üzrə təqdimatı avqustun 3-də keçiriləcək. Onların "Samsung" tərəfindən ənənəvi olaraq əsas rəqib hesab edilən yeni "iPhone" modelləri buraxılmazdan əvvəl satışa çıxarılması nəzərdə tutulur.

"Galaxy Z Fold 3" və "Galaxy Z Flip 3" smartfonlarının, xüsusilə elastik ekranlı qatlanan sonuncu modelin əvvəlki qurğulardan daha ucuz olacağı gözlənilir.