Siciliyada meşə yanğını törətməkdə şübhəli bilinən çobanlar saxlanılıb

Tarix: 15 Avqust 2021 23:02

İtaliyanın Siciliya adasında meşə yanğını törətməkdə şübhəli bilinən iki çoban saxlanılıb.

Sonxeber.net AZƏRTAC-a istinadən bildirir ki, çobanlar quru otlaq ərazini yandırarkən yaxalanıblar. Onların bölgədə davam edən meşə yanğınlarına səbəb olduqları iddia edilir.

Polisin yaydığı məlumata görə, yekunlaşan istintaq nəticəsində məlum olub ki, çobanlar öz heyvanları üçün quru otlaq ərazini yandırıblar. Onlar iyul ayından etibarən bölgədə baş verən ardıcıl meşə yanğınlarında şübhəli bilinirlər.

Prokurorluğun açıqlamasında çobanların məqsədinin yemə qənaət etmək üçün heyvanların otlaq sahəsini artırmaq olduğu bildirilib.

Xatırladaq ki, İtaliyanın Siciliya və Kalabriya bölgəsində yanğınsöndürənlər son günlərdə 500-dən çox böyük və kiçik yanğına müdaxilə ediblər. İyul ayında Sardiniya adasında baş verən meşə yanğınları nəticəsində yüzlərlə hektar yaşıllıq məhv olub.

Ekologiya Nazirliyinin məlumatına görə, İtaliyada meşə yanğınlarının 70 faizinə insanlar bilərəkdən və ya bilməyərəkdən səbəb olublar.