Dünyanın ən zəngin iş adamı 20 il həbs oluna bilər

Tarix: 5 Yanvar 2022 18:40

"Theranos"un qurucusu Elizabet Holms 20 il müddətinə qədər həbs oluna bilər.

Milli.Az Axşam.az-a istinadən xəbər verir ki,  ötən gün Kaliforniyanın San Xose şəhərində keçirilən məhkəmə prosesi zamanı 37 yaşlı Elizabet 11 maddədən dördü üzrə təqsirli bilinib. Sahibkarın investorları aldatmaq üçün qeyri-qanuni yollara əl atdığı və fırıldaqçılıqda günahkar olduğu sübuta yetirilib.

Elizabeti 20 il müddətinə qədər həbs və bir milyon dollara qədər cərimə gözləyir. Lakin vəkillərin fikrincə, ona maksimum cəza veriləcəyi ehtimalı azdır. Münsiflər heyəti hələ üç məsələdə qənaətə gəlməyib, bu səbəbdən onlar hələ də məsələni nəzərdən keçirəcəklər.

Qeyd edək ki, E.Holms 19 yaşında Stenford Universitetindən məzun olduqdan sonra "Theranos" startapını yaradıb və bu işlə şöhrət qazanıb. Sahibkar iddia edib ki, o, sadəcə bir damcı qanla geniş diaqnostik diaqnostikaya dərhal kömək edəcək unikal cihaz icad edib. 2003-cü ildə açılan şirkət nəhəng investisiyalar cəlb edib. 2014-cü ilə qədər şirkətin dəyəri artıq doqquz milyard dollar olaraq qiymətləndirilirdi. Startapın investorları arasında Rupert Merdok və Bill Klinton kimi adlar da yer alıb.

Sərvəti 4,5 milyard dollara çatan və bunu təkbaşına bacaran Elizabet Amerikanın ən zəngin qadınlarının "Forbes" reytinqinə adını yazdırmağı bacarıb. Mətbuat onu demək olar ki, yeni Stiv Cobs adlandırdı.

Onun uğur hekayəsi 2015-ci ildə  "Theranos" texnologiyasının işləmədiyi ortaya çıxanda sona çatır. "The Wall Street Journal"da dərc olunan araşdırmaya görə, şirkət gizli şəkildə başqasının avadanlıqları üzərində analizlər aparırmış. Həmçinin xəstələrə səhv diaqnoz qoyulduğu da bildirilib. Holms özü də bunu etiraf etmək məcburiyyətində qalıb, lakin o, gələcəkdə yanlış sınaq nəticələrinin qarşısını almaq üçün laboratoriyanı sıfırdan yenidən qurmağa hazır olduğunu bildirib.

Bundan sonra ABŞ prokurorluğu Holmsun investorları və rəsmiləri bilərəkdən çaşdırması ehtimalını araşdırmağa başlayıb.

2018-ci ildə şirkət bağlanıb, 2021-ci ilin yayında isə onun məhkəməsi başlayıb.

Onu da qeyd edək ki, bu il Hulu xidməti Elizabetin hekayəsinə əsaslanan ekran işi nümayiş etdirəcək. "The Dropout" adlı filmdə baş rolu aktrisa Amanda Seyfrid canlandıracaq.

Milli.Az