“Putinin iki yolu var: pis və daha pis...”

Tarix: 16 Mart 2022 17:38

"Bu gün Putinin iki seçimi var: Pis və çox pis. Bu, dövlətə və ya Putinə hansı variantın daha yaxşı olmasından asılıdır".

Sonxeber.net "azpolitika.info"ya istinadən xəbər verir ki, bu barədə siyasi şərhçi Rauf Mirəqdirov "Ukraynada müharibə nə zaman və necə bitəcək və bu ölkələri gələcəkdə nə gözləyir" sualını cavablandırarkən danışıb.

"Putin üçün pis variant odur ki, o, geri çəkilib, qələbə nümayiş etdirmədən Ukrayna ilə sülh müqaviləsi bağlasın. O, geri çəkilir və vəziyyəti sabitləşdirməyə çalışır. Sonuncu variant isə Rusiya üçün yaxşıdır, çünki ən azı beynəlxalq ictimaiyyətlə münasibətləri normallaşdırmaq şansı var. Qısa müddətdə deyilsə də, heç olmasa uzunmüddətli perspektivdə. Axı Qərbin heç olmasa minimum etimadını qazanmaq üçün vaxt lazımdır. Aydındır ki, sanksiyalar dərhal aradan qaldırılmayacaq, bunun üçün vaxt lazımdır", - təhlilçi əlavə edib.

R.Miqrəqdirovun sözlərinə görə, bu variant Putin üçün pisdir, çünki onun reytinqini, xüsusən də naməlum səbəblərdən kor-koranə onu dəstəkləməkdə davam edən kütlə arasında aşağı düşmə təhlükəsi yaradır: "Bu isə Putinin özü üçün dağıdıcıdır. Xüsusən də qarşıdan gələn seçkilər ərəfəsində. Rusiya dövləti üçün çox pis variant, Putin üçün ən yaxşı varianta görə Kiyevi nəyin bahasına olursa-olsun ələ keçirmək və paytaxtda "qələbə paradı" keçirməkdir. Belə olan halda Rusiya Qərb dünyası ilə normal münasibətləri bərpa edəcəyinə bütün ümidlərini itirir".

Siyasi şərhçi əlavə edir ki, Rusiya sosial-iqtisadi blokadadan çıxa bilməyəcək və bu sahədə geriləmə göz qabağında olacaq. Onun sözlərinə görə, Putinin xarici siyasət meydanında uğursuzluğa düçar olacağı açıq-aydın Rusiya iqtisadiyyatının çökməsinə gətirib çıxaracaq: "Döyüş əməliyyatları ilə bağlı proqnoza gəlincə, düşünürəm ki, onlar bir ay yarımdan çox çəkməyəcək. Ola bilsin daha az. Çünki Putin həm Rusiya elitası, həm də beynəlxalq ictimaiyyət tərəfindən güclü təzyiq altındadır".