"Sirt-food" pəhrizi ilə arıqlayın

Tarix: 6 Noyabr 2022 14:42

Son zamanlar istifadə olunan pəhriz proqramlarından biri də "Sirt-food"dur (Sirtuin). Bir çox dünya ulduzunun məhz bu proqram vasitəsi ilə arıqladığı və formada qaldığı bildirilir.

Milli.Az Axşam.az-a istinadən xəbər verir ki, bu pəhriz sirtuin genini aktivləşdirərək maddələr mübadiləsini sürətləndirir.

Bu pəhrizə daxil olan qidalar isə aşağıdakılardır:

- Kakao
- Çiyələk
- Qarabaşaq
- Zeytun yağı
- Qəhvə
- Yaşıl çay
- Cəfəri
- Kərəviz
- Aruqula
- Qaragilə
- Qırmızı soğan
- Soya
- Sarıkök
- Qoz

Bəs bu pəhrizi necə saxlamaq olar?

İlk 3 günü içki və 1 əsas yeməklə tamamlamaq, ardınca 4 gün ərzində 2 əsas yemək, yuxarıda sadalanan qidalardan yemək və yaşıl (təbii) içkilər içmək, ardınca 14 gün ərzində 3 əsas yemək və içkilərlə pəhrizi tamamlamaq lazımdır. Proqram 21 günü əhatə edir.

Qeyd edək ki, ilk 3 gündə maye ilə qidalanmaq, sıx iş qrafiki və ya artıq çəkisi olan şəxslər üçün çox aşağı kalori ehtiva etdiyi üçün sağlamlıq üçün əlverişsizdir.

Gündəlik:

Səhər: 1 çay qaşığı zeytun yağı ilə hazırlanmış tərəvəz omleti

2 bütöv qoz ləpəsi

İstədiyiniz qədər cəfəri və ya aruqula (roka)

1 dilim qarabaşaq çörəyi 

Qəlyanaltı: 1 ədəd portağal +1 ədəd qoz 

Günorta: 1 alma + 4 xörək qaşığı qaynadılmış qarabaşaq + yarım qırmızı soğan, roka və cəfəri ilə hazırlanmış salat (salata 1 çay qaşığı zeytun yağı əlavə edin)

Qəlyanaltı: Sadalanan qidalardan hazırlanan içki için

Axşam: 100-150 qram qril (qaynadılmış qırmızı və ya ağ ət)

Roka - cəfəri - 1 portağal dilimləri və 1 çay qaşığı zeytun yağı ilə hazırlanmış salat (toxluqdan asılı olaraq salatınıza 3-4 xörək qaşığı qaynadılmış qarabaşaq əlavə etmək olar)

Gündə ən azı 2,5 litr su istehlak edilməlidir.

Yaşıl içkinin hazırlanması:

7-8 ədəd aruqula

5-6 ədəd cəfəri

2 kərəviz sapı

1 çimdik zəncəfil və ya yarım çay qaşığı üyüdülmüş zəncəfil

½ orta alma

½ orta limon

½ matça yaşıl çayı blenderdən keçirərək hazırlanır.

Milli.Az