Hamamda doğduğu uşağı bağçada basdırdı

Tarix: 22 Dekabr 2022 02:46

Rusiyada, Nijni Novqorod vilayətinin Diveyevo kənd sakini vaxtından əvvəl qızını hamamda dünyaya gətirib və bağçada basdırıb.

Sonxeber.net bildirir ki, bu barədə "R2N - Nijni Novqorod" Telegram kanalı məlumat yayıb.

Paylaşım edən müəlliflərin məlumatına görə, rusiyalı qadın hamiləliyinin yeddinci ayında olub. Qadın iddia edib ki, körpədə həyat əlaməti olmayıb, ona görə də onu vedrəyə qoyub yaşadığı ərazidə basdırıb.

Nijni Novqorod vilayətinin İstintaq Komitəsi xəbər verib ki, şəxsi evin həyətində qız meyitinin aşkarlanmasına görə ehtiyatsızlıqdan ölümə səbəb olması ilə bağlı cinayət işi açılıb. İstintaqın məlumatına görə, 32 yaşlı qadın hamilə olduğu üçün xəstəxanada qeydiyyatda olsa da, nə doğuşdan əvvəl, nə də doğuşdan sonra həkimlərə müraciət etməyib. Bundan əlavə, o, psixiatrın nəzarəti altında olub.

Komitədən verilən məlumata görə, qızın cəsədinə baxış zamanı heç bir zorakılıq əlamətləri aşkar edilməyib. Körpənin dəqiq ölüm səbəbi məhkəmə-tibbi ekspertizası tərəfindən müəyyən ediləcək.

İrfan Vəliyev