Əlini timsah dişləyən kişi bu yolla sağ qaldı

Tarix: 30 Dekabr 2022 20:52

Əlini timsah dişləyən ABŞ sakini Florida ştatının Myakka şəhəri yaxınlığındakı bataqlıqda üç gün sürünəndən gizlənərək sağ qalıb.

Sonxeber.net bildirir ki, bu barədə "The Sun" məlumat yayıb.

43 yaşlı Erik Merda Manati gölündəki balıqçılar düşərgəsində istirahət edib. Kişi sərxoş halda çimməyə gedib: polis onun furqonunda marixuana və bir şüşə viski tapıb.

Merda üzərkən yaxınlıqda timsahın olduğunu görüb. Birdən sürünən onu dişləyib. Timsah amerikalının əzasını dirsəyinə qədər dişləyib və onu üç dəfə suyun altında sürükləməyə çalışıb. Lakin qolunu itirən Merda qalan qolu ilə sürünəni tutub ona təpik vurmağı bacarıb. Bundan sonra yırtıcı üzərək uzaqlaşıb.

Zərərçəkən suya girdiyi yerə üzməyə çalışsa da, tezliklə nəhəng göldə azdığını anlayıb. "Hər şey bir saniyə ərzində baş verdi. İldırım kimi idi. Öldüyümü düşündüm. Fikirləşdiyimi xatırlayıram: "Bu doğru ola bilməz. Artıq əlim yoxdur. Artıq əlim yoxdur! Mən yatmışam", - o deyib.

Bir neçə saatdan sonra Merda qalın otla örtülmüş bataqlıq sahilə çata bilib. Gecəni orada keçirməli olub. Səhər saatlarında amerikalı ağaca dırmaşaraq bir neçə saat başı üstündə uçan təyyarələrin diqqətini çəkməyə çalışıb. Sonra gəldiyi yeri tapmaq ümidi ilə sahil boyu yoluna davam edib. Bu zaman onun qanaxması dayanıb, lakin ətrafına milçəklər yığılmağa başlayıb.

Bəzən kişi timsahın başının suyun səthindən yuxarı qalxdığını görüb. "Mən hiss etdim ki, o, məni gözləyir", - kişi deyib. Adam ikinci gecəni suyun kənarında kiçik bir beton plitə üzərində keçirib. Ertəsi gün o, yenidən bataqlıqdan çıxmağa çalışıb, ancaq səhv getdiyini başa düşüb. Dördüncü günə qədər o, cəmi 100 metr məsafə qət etdiyini başa düşüb.

Nəhayət kişi boş pivə şüşəsi tapıb və anlayıb ki, yaxınlıqda insanlar ola bilər. Tezliklə o, furqonunu və yaxınlıqda maşını saxlamış bir kişini görüb. Xilasedicilər hadisə yerinə yarım saatdan sonra gəliblər. Merda üç həftə yerli xəstəxanada yatıb. Qolunun qalan hissəsi infeksiyanın qarşısını almaq üçün amputasiya edilib.

İndi Merda həvəsləndirici spiker olmağı planlaşdırır. "Qorxu yaxşı şeydir", - o deyib.

İrfan Vəliyev