Əhval-ruhiyyəsi aşağı olan şəxslərə depressiya diaqnozu qoyula bilməz - Mərkəz direktoru

Tarix: 17 Yanvar 2020 16:15

Bakı. İlhamə İsabalayeva - Trend:

Bəzi insanlar əhval-ruhiyyəsi olmayanda elə hesab edirlər ki, depressiyadadırlar. Amma depressiyanın özünü çox aydın şəkildə göstərən əlamətləri var.

Trend-in məlumatına görə, bunu Psixi Sağlamlıq Mərkəzinin direktoru Fuad İsmayılov "Kardiologiya və psixiatriya: kardioloji pasiyentlərdə psixi pozuntuların profilaktikası" mövzusunda elmi-praktik konfransda çıxışı zamanı deyib.

Onun sözlərinə görə, depressiyada olan insanlarda ruh düşkünlüyü ən azı 2 həftədən çox müşahidə edilməlidir. Əgər insanda əhval-ruhiyyənin aşağı olması bir neçə gün davam edirsə, belə şəxslərə depressiya diaqnozu qoyula bilməz. Depressiyasısı olan insanlarda maraq, zövq hissi azalır, enerji tükənir. Depressiya zamanı ya yuxusuzluq, ya da yatmağa meyillilik ola bilər. İştahın, ümumi aktivliyin artması və ya azalması ola bilər. Belə insanların intihar etməklə bağlı fikirləri də olur".

Depressiyanı çox ciddi xəstəlik sayan F.İsmayılov bildirib ki, Azərbaycanda depressiyadan əziyyət çəkənlərin statistikası dünya ölkərində olduğu kimidir.
Onun sözlərinə görə, bütün dünyada olduğu kimi Azərbaycanda da depressiyadan əziyyət çəkənlərin sayında artım müşahidə olunur.

F.Ismayılov deyib ki, depressiyadan əziyyət çəkənlərin intihar etməməsi üçün vacib olan əsas şərtlər pozitiv düşüncənin olması, insanlarla müsbət, səmimi müsbətlərin qurulması, müsbət keyfiyyətli insanlarla münasibətin qurulması və həkimə vaxtında müraciət edilmədir.

Mərkəz direktoru qeyd edib ki, depressiya qadınlar arasında daha çox müşahidə edilir: "Bu, qadınların emosional cəhətdən daha həssas olması, kişilərə nisbətən qadınların daha məsuliyyətli olmasıdır. Digər tərəfdən qadınlar kişilərə nisbətən daha çox zorakılığa məruz qalırlar. Məsələn, ailə dağıldıqda kişi bunu faciə kimi qəbul etmir, amma bu qadın üçün çox çətin olur".

Trend-in ən mühüm və maraqlı xəbərlərini "Telegram"da izləyin