ABŞ-ın Milli Qvardiya qoşunları Vaşinqtondan çıxarılır

Tarix: 8 Iyun 2020 01:16

Bakı. Trend:

ABŞ prezidenti Donald Tramp Milli Qvardiya qoşunlarının ölkənin paytaxtı Vaşinqtondan çıxarılması barədə əmr verib.

Trend-in "İnterfaks"a istinadən verdiyi məlumata görə, bu barədə D.Tramp öz "Twitter" səhifəsində yazıb.

D.Tramp bildirib: "Mən indicə Milli Qvardiyamıza Vaşinqtondan qoşunların çıxarılması prosesinə başlamağı əmr etdim, çünki hazırda hər şey tam nəzarət altındadır".

ABŞ prezidenti qeyd edib ki, Milli Qvardiya hərbçiləri evə qayıdırlar, lakin ehtiyac olduğu halda geri gələ bilərlər.

Onun sözlərinə görə, dünən axşam etirazçıların sayı gözləniləndən daha az olub.

Bundan əlavə, vəziyyətin stabilləşməsi ilə əlaqədar Nyu-York şəhərinin meri Bill de Brazio komendant saatının ləğv edildiyini bəyan edib.

Qeyd edək ki, ABŞ-ın Minneapolis şəhərində (Minnesota ştatı) afroamerikalı Corc Floydun ölümündən sonra başlayan etiraz aksiyaları səbəbilə 33 ştatda və Kolumbiya dairəsində asayişi qorumaq üçün 41,5 min Milli Qvardiya hərbçisi cəlb edilmişdi.