Bayramqabağı əhalinin alıcılıq qabiliyyəti artır, bu da marketlərdə sıxlığa səbəb olur - Ekspert

Tarix: 16 Mart 2020 16:08

"Son günlər Bakının ərzaq mağazalarında alıcılıq qabiliyyətinin artması bir neçə amillə əlaqədardır".

Sonxeber.net xəbər verir ki, bunu Trend-ə açıqlamasında iqtisadi ekspert Elşad Məmmədov deyib.

Onun sözlərinə görə, əhalinin son günlər alıcılıq qabiliyyətinin artmasına əsas səbəblərdən biri Novruz bayramı ilə əlaqədardır:

"Bayramqabağı əhalinin alıcılıq qabiliyyəti artır, bu da marketlərdə sıxlığa səbəb olur. Digər tərəfdən, ötən həftə valyuta bazarında baş verən proseslər də buna təsir edib. Belə olan halda əhali arasında gərginlik yaranır. Düşünürəm ki, bu gərginliyin heç bir ciddi fundamental əsası yoxdur. Azərbaycanın istehlak bazarı lazımi səviyyədə təşkil olunub. Ölkənin istehlak bazarını lazımi səviyyədə məhsul və xidmətlərlə təchiz etmək qabiliyyəti var. İstehlak bazarını təmin etmək üçün ölkənin kifayət qədər resursları var. Bu məsələdə hansısa ajiotajın yaranması qeyri-konstruktivdir. Bununla bağlı aidiyyəti dövlət qurumları da müvafiq bəyanatlar verdi. Valyuta bazarında da artıq müəyyən sakitləşmə baş verib. Amma daha uzunmüddətli perspektivdə baş verən prosesləri nəzərə almalıyıq və buna görə də milli iqtisadiyyatımızın şaxələndirilməsinə, idxaldan asılılığın azalmasına, yerli real sektorun inkişafına daha çox önəm verməliyik".