XİN-dən hərbçinin şəhid olması ilə bağlı: Həmsədrlərin bölgəyə səfəri zamanı Ermənistanın bu qanlı əməli təxribatdır

Tarix: 30 May 2019 19:10

Bakı. Trend:

Xarici İşlər Nazirliyi Azərbaycan Ordusunun hərbi qulluqçusunun şəhid olması ilə bağlı açıqlama yayıb.

Nazirlikdən Trend-ə verilən xəbərə görə, məlumatda deyilir:

"Bu gün Ermənistan-Azərbaycan qoşunlarının təmas xəttinin Ağdam rayonu istiqamətində Ermənistan silahlı qüvvələri tərəfindən atəşkəs rejimi kobud şəkildə pozulub və snayperdən açılan atəş nəticəsində Azərbaycan Ordusunun hərbi qulluqçusu şəhid olub.

Xüsusilə qeyd etmək istərdik ki, ATƏT-in Minsk Qrupunun həmsədrlərinin bölgəyə səfəri zamanı Ermənistan silahlı qüvvələri tərəfindən törədilən bu qanlı əməl təxribat xarakteri daşıyır və münaqişənin həlli üzrə aparılan danışıqları pozmaq məqsədinə xidmət edir.

İşğalçı Ermənistan rəhbərliyinin sözdə münaqişənin həlli üzrə sülh şəraitinin yaradılması bəyanatlarının real və praktiki addımlarla müşayiət olunmadığını, əksinə Ermənistanın təxribatçı fəaliyyəti ilə sülh danışıqlarına xələl gətirmək niyyətini açıq şəkildə nümayiş etdirən bu qanlı əməl qəti qəbuledilməzdir və danışıqlar prosesinə zərbə vurur.

Törədilmiş qanlı cinayətin bütün mümkün mənfi nəticələrinə görə məsuliyyət tam şəkildə Ermənistanın üzərindədir".

Trend-in ən mühüm və maraqlı xəbərlərini "Telegram"da izləyin