“Gənclərin Məşğulluğu” proqramına 614 gənc cəlb edilib (FOTO)

Tarix: 12 Iyun 2019 15:20

Bakı. Trend:

Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti və Gənclər Fondunun birgə layihəsi olan “Gənclərin Məşğulluğu” proqramı cari ilin aprel ayında start götürüb.

Nazirlikdən Trend-ə verilən məlumata görə, ötən dövrdə proqrama artıq 614 nəfər gənc cəlb edilib.

Hazırda işəgötürənlər tərəfindən həmin gənclər arasından müvafiq peşə-ixtisas bacarıqları üzrə namizədlərin seçimi aparılır. Müsbət haldır ki, proqrama qoşulmaq istəyən işəgötürənlərin də sayı artır.

Bu barədə Dövlət Məşğulluq Xidməti və Gənclər Fondunun layihəyə qoşulmaq istəyən şirkətlərin nümayəndələri ilə keçirdikləri görüşdə bildirilib.

Görüşdə proqram barədə ətraflı məlumat verilib. Qeyd edilib ki, layihə ali və orta-ixtisas təhsili müəssisələrinin 29 yaşına qədər olan məzunlarının işə cəlb olunmasını, müəyyən müddət ərzində onların əmək haqlarının bir qisminin Fond tərəfindən maliyyələşdirilməsini nəzərdə tutur. Proqramın icrası zamanı sosial cəhətdən həssas kateqoriyalardan (əlilliyi olan şəxslər, şəhid ailəsi üzvləri, məcburi köçkünlər və s.) olanlara, regionlarda yaşayanlara, iş təcrübəsi olmayanlara üstünlük verilir.

Yaxın günlərdə Gənclər Fondu tərəfindən “Gənclərin Məşğulluğu” proqramının icrası çərçivəsində “CV bankı” da yaradılacaq. Bununla da işəgötürənlər layihəyə müraciət edən gənclər arasından onlara lazım olan peşə-ixtisas bacarıqlarına malik gəncləri daha rahat şəkildə seçə biləcəklər.

Trend-in ən mühüm və maraqlı xəbərlərini "Telegram"da izləyin