Aktual mövzular: Dollar alış-satışı, Məzənnə, Neftin qiyməti

Səhvən, yaxud qəsdən vurulan sərnişin təyyarələri – ARAŞDIRMA

Səhvən, yaxud qəsdən vurulan sərnişin təyyarələri – ARAŞDIRMA

Tarix: 14 Yanvar 2020 21:16

Yanvarın 8-də İranda qəzaya uğrayan Ukrayna sərnişin təyyarəsi ilə bağlı xəbərlər gündəmi zəbt edib. Bu gün İran tərəfinin verdiyi açıqlamada isə təyyarənin səhvən vurulduğu bildirilib.

Milli.Az ted.az-a istinadən səhvən, yaxud qəsdən vurularaq böyük insan təlafatına səbəb olmuş bir neçə təyyarə haqqında məlumatları oxucularına təqdim edir:

Liviyaya məxsus "Arab Airlines" aviaşirkətinin "Boinq-727" təyyarəsi 1973-cü ildə qum fırtınasına düşüb. Təyyarə fırtınanın təsirilə Sinay yarmadasına doğru yön alıb. Bu zaman İsrailə məxsus 2 "Air force F-4" qırıcısı təyyarənin qarşısını kəsmək üçün xəbərdarlıq atəşi açıb. Sərnişin təyyarəsi xəbərdarlıq atəşindən sonra istiqamətini qərbə çevirib. Hərbi təyyarələrin pilotları isə bunu qaçış kimi dəyərləndirərək atəş açıblar. Nəticədə sərnişin təyyarəsindəki 113 nəfərdən 108-i həlak olub.

1980-cı il iyulun 27-də 81 nəfəri daşıyan İtaliyaya məxsus "İtavia" aviaşirkətinin DC-9 sərnişin təyyarəsi Tirren dənizinə düşüb. Sərnişinlərdən sağ qalan olmayıb. Əvvəlcə qəza səbəbi texniki problemlər göstərilsə də, digər versiya Fransa qırıcılarından atılan raketlə təyyarənin vurulmasıdır.

Sovet qırıcısı 1983-cü ilin sentyabrın 1-də Yapon dənizi üzərində Cənubi Koreyanın "Boinq-747"sini vurub. 269 nəfər həlak olub. Səbəb kimi təyyarənin SSRİ hava məkanını pozması göstərilib.

1988-ci ilin 3 iyulunda ABŞ kreyseri "Vinsennes" Fars körfəzi üzərində İran Air" şirkətinə məxsus Airbus A300B2-203 sərnişin təyyarəsini hədəfə alıb. İnsidentdə 66-sı uşaq olmaqla, 290 nəfər həlak olub. ABŞ hökuməti sərnişin təyyarəsinin səhvən F-14 qırıcı təyyarəsi kimi qeydə alındığını açıqlayıb. İran hökuməti isə kreyser komandanlığının qəsdən bu addımı atdığını irəli sürüb.

Təl-Əviv-Novosibirsk reysi ilə uçan "Sibir" aviaşirkətinə məxsus "Tu-154" 2001-ci ilin 4 oktyabrında Qara dəniz üzərində Ukrayna Ordusunun açdığı təlim atəşi nəticəsində S-200 raket kompleksi ilə vurulub. 66 sərnişin, 12 ekipaj üzvü həlak olub. Rusiya tərəfi isə hadisəni terror aktı kimi qiymətləndirib.

2014-cü ilin 17 iyulunda Ukraynanın Donetsk bölgəsində Malayziyaya məxsus sərnişin təyyarəsi qəzaya uğrayıb. Əvvəlcə nəqliyyat vasitəsinin texniki problemlərə görə qazaya uğradığı deyilsə də, sonradan aydın olub ki, layner Rusiyadan gətirilən "Buk" raket kompleksi ilə vurulub.

İnsident nəticəsində sağ qalan olmayıb. 298 nəfər (283 sərnişin, 15 ekipaj üzvü) həlak olub. Rusiyayönümlü seperatçılar təyyarənin vurulmasına görə, məsuliyyəti öz üzərilərinə götürüblər. Rusiya tərəfi isə hadisə ilə bağlı bütün ittihamları rədd edir.

Milli.Az


Etiketlər:  Səhvən yaxud qəsdən vurulan sərnişin təyyarələri ARAŞDIRMA


RƏYLƏR

ƏN ÇOX OXUNAN XƏBƏRLƏR




Populyar Xəbərlər

XƏBƏR LENTİ